Assalamu′alaikum kawôm Islami
Saleuem ulôn bi keupada Sahbat
Agam ngon inöng tunöng ngon pasi
Ahli famili timu ngon barat
Saleuem lônpeu ék tabék ulôn bri
Sambôt hai akhi dum masyarakat
Tanda mulia tanyoë Islami
Saleuem kheun Nabi tabaca sunat
Alhamdulillah, Allahurabbi
Pujoe Ilahi Nyang Maha Qudrat
Seulaweuet Saleuem takheun keu Nabi
Sidroe Rasuli mulia mulia that that
Nabi Muhammad Muekjizat neubi
Rasul Ilahi manyang derajat
Para Ulama hana jeut peusi
Ureueng peuturi jalan nyang teupat
Deungon Rahmat Po sidroë Ilahi
Ulon meurawi tuboh beu sihat
Na bacut rampoe ulôn nyoe rawi
Syair Informasi cara hikayat
Ammabakdu laju mulai
Ulon ci rawi padumkrèk surat
Keui uroe raya mulia ngon suci
Uroe Raya Haji Idul Adzha meuhat
Geutanyoe Islam saban jeut jeut si
Pujoe Ilahi deungon sabé taingat
Uroe Rya Qurbeun geukheun that suci
Seunang han sakri ban mandum umat
Bak uroe raya tanyoe nikmati
Aman jeuet jeuet si damè leupah that
Meuꞌah meumeuꞌah silaturrahmi
Sanak family kawôm keurabat
Bèk na lé dendam rakan famili
Suasana Haji saban ta ingat
Haté mulia Ridha Fahla Allah bi
Bak uroe suci muttaqin umat
Dan lom sahabat ingat hai akhi
Keu nyang di haji meudôa siat
Beuseuleusoe pubuet dum rukôn haji
Beu ek Allah bi anggota sehat
Mulai bak Tawaf wukuf saꞌi
Arafah beuneubri pubuet beumangat
Beutrôh ziarah bak qubu Nabi
Meunjadi Haji Mabbrura meuhat
Dan bak buleuen nyoe tanyoe hai akhi
Soe na raseuki taqurban leugat
Lethat fahala Allah Taꞌala bi
Uroe raya haji soe na tem ingat
Piké e sampèe teuntèe hai abi
Qurbeun hai akhi that le mamfaꞌat
Untuk membantu ibu ngon abi
Nyang hudép faqi sengsara meuhat
Ureueng nyang gasien miskin lam bumi
Uroe Raya Haji seudéh kadang that
Ngon na bantuan gob nyan na bagi
Teumèe pajôh sie tumon bu mangat
Inakeuh rakan nyan that meu arti
Uroe Raya Haji cukôp le rahmat
Tanyoe gembira tabaca takbi
Pujoe Ilahi Nyang Maha qudrat
Uroe kesenangan insan lam bumi
Mandum islami lam dônya meuhat
Meu′ah meu meu′ah ayah ngon ummi
Silaturrahmi keluarga keurabat
Bak ibuk bapak tajak kunjungi
Bak gurèe ngaji guru lom meuhat
Tajak bak qubu nyo tan lé ummi
Bak Qubu Abi dô′a munajat
Nibak uroe nyoe uroe raya haji
Sanak famili peu meu′ah leugat
Deungon ikhlas beuglah dum iri
Dendam pribadi dengki kuseumat
Bèk na lé musôh piyôh buet keji
Tanyoe pribadi sifeut beu taꞌat
Damè ngon tentram nyan nyang that meukri
Dusôn ngon pasi ukhwah beukong that
Meunan cit pemimpin salihin beumeukri
Adé peuduli keupada rakyat
Ulama Umara beuna sejati
Bak uroe raya haji tatueng beureukat
Tanyoe beudamè bèk na lé dengki
Bèk na lé iri hasut keusumat
Pemimpin ngon rakayat meuhat seu biti
Bèk caci maki hujat meunghujat
Bak uroe mulia hana lé dengki
Hana lé iri deungon buet jahat
Hana lé musôh kirôh emosi
Uroe raya Haji jaroe tamumat.
Seulamat uroe nyoe uroe raya haji
Dari Ilahi beuneubi Rahmat
Peumeuah désya syédara jeut si
Bak uroe suci haté beumangat
Semoga tanyoe rugoe bèk neubi
Ridha Ilahi lam jeut jeut saat
Èt noë keuh Caé hasé lôn rawi
Meu′ah hai akhi nyo kureueng mangat
